Péncum Maam Yunus Jeŋ ndaje la mu nuy waxtaane téere yi ñu bind ci làmmiñi réew mi. Li ko tax a sosu mooy siiwal ak gëddaal téere yooyu.

Ndaje yooyu ci kàllaamay réew mi lees koy defe, di ci waxtaane téerey ladaab ak yu xamtu yi gën a ràññeeku. Danu ko tudde Maam Yunus Jeŋ, mu nekkoon jigéen ju jàmbaare, doon jàngalekat, ak bindkat. Moom moo jëkk sotti « Hymne national » bu Senegaal ci wolof, tudde ko bàkku Senegaal. Bind na ay taalif yu am solo ak téere bu siiw, tudde ko Aawo bi.

Péncum Maam Yunus Jeŋ, fas na yéene itam sargal sunuy jàmbaar yi xàll yoon wi, mbaa ñiy dundal sunu làmmiñi réew yi.